महाराष्ट्र चित्रपट, रंगभूमी आणि सांस्कृतिक विकास महामंडळाच्या दादासाहेब फाळके चित्रपट रसास्वाद मंडळ उपक्रमांतर्गत अभिनेते अरुण सरनाईक यांच्या जीवनावर आधारित 'पप्पा सांगा कुणाचे...' माहितीपटाचे विशेष प्रदर्श

 महाराष्ट्र चित्रपट, रंगभूमी आणि सांस्कृतिक विकास महामंडळाच्या दादासाहेब फाळके चित्रपट रसास्वाद मंडळ उपक्रमांतर्गत अभिनेते अरुण सरनाईक यांच्या जीवनावर आधारित 'पप्पा सांगा कुणाचे...' माहितीपटाचे विशेष प्रदर्शन

महाराष्ट्र चित्रपट, रंगभूमी आणि सांस्कृतिक विकास महामंडळ अंतर्गत दादासाहेब फाळके चित्रपट रसास्वाद मंडळ आयोजित मराठी चित्रपटसृष्टीतील प्रसिद्ध अभिनेते स्व. अरुण सरनाईक यांच्या जीवनावर प्रकाश टाकणाऱ्या 'पप्पा सांगा कुणाचे...' या विशेष माहितीपटाचे प्रदर्शन आयोजित करण्यात आले आहे.या विशेष माहितीपटाचे प्रदर्शन शुक्रवार, २७ फेब्रुवारी २०२६ रोजी दुपारी ३ वाजता लघु नाट्यगृह, पु. ल. देशपांडे महाराष्ट्र कला अकादमी, प्रभादेवी, मुंबई येथे होणार आहे.

स्व. अरुण सरनाईक हे मराठी चित्रपटसृष्टीतील एक अत्यंत लोकप्रिय, राजबिंडे आणि दिग्गज अभिनेते व गायक होते. १९६०-७० च्या दशकात 'रंगल्या रात्री अशा', 'मुंबईचा जावई', 'केला इशारा जाता जाता' यांसारख्या अनेक सुपरहिट चित्रपटांतून त्यांनी अभिनय आणि गाण्यांचा ठसा उमटवला. त्यांना चार महाराष्ट्र राज्य चित्रपट पुरस्कार देखील मिळाले होते. 

अरुण सरनाईक यांची मुलगी डॉ. सविता सरनाईक - नाईकनवरे यांनी आपल्या वडिलांच्या स्मृतींना उजाळा देण्यासाठी 'पप्पा सांगा कुणाचे...' या माहितीपटाची निर्मिती केली. हा माहितीपट जुन्या आठवणी, दुर्मिळ दस्तऐवज आणि वैयक्तिक संवादांतून अरुण सरनाईक यांचा वारसा प्रभावीपणे उलगडतो. डॉ. संतोष पाठारे यांनी या माहितीपटाचे दिग्दर्शन केले आहे. 

दिग्गज अभिनेते स्व. अरुण सरनाईक यांच्या जीवनावर प्रकाश टाकणाऱ्या 'पप्पा सांगा कुणाचे...' हा माहितीपट पाहण्यासाठी सिनेप्रेमीनी उपस्थित राहावे, असे आवाहन सह व्यवस्थापकीय संचालक प्रशांत साजणीकर यांनी केले आहे. 

कधी : २७ फेब्रुवारी २०२६

वेळ : दुपारी ३ वाजता 

कुठे : लघु नाट्यगृह, पु. ल. देशपांडे महाराष्ट्र कला अकादमी, प्रभादेवी, मुंबई.