कोटक वेल्थ आणि हुरून इंडियातर्फे ‘कोटक वेल्थ हुरून - लीडिंग वेल्दी विमेन’ची दुसरी आवृत्ती सादर

कोटक वेल्थ आणि हुरून इंडियातर्फे

 ‘कोटक वेल्थ हुरून - लीडिंग वेल्दी विमेन’ची दुसरी आवृत्ती सादर

 मुंबई, ३ डिसेंबर २०२०: कोटक महिंद्रा बँकेचा (कोटक) कोटक वेल्थ मॅनेजमेंट हा विभाग आणि हुरून इंडिया यांच्या संयुक्त विद्यमाने आज ‘कोटक वेल्थ हुरून - लीडिंग वेल्दी विमेन’च्या दुसऱ्या आवृत्तीच्या लाँचची घोषणा करण्यात आली. ३० सप्टेंबर २०२० रोजी असलेल्या महिलांच्या संपत्तीवर ही यादी आधारीत आहे. या अहवालाच्या २०२० च्या आवृत्तीमध्ये, ज्या महिलांनी आपल्या कौटुंबिक व्यवसायात सक्रिय भूमिका निभावलेली आहे, ज्या उद्योजक आहेत आणि व्यावसायिक आहेत, अशा महिलांवर भर देण्यात आला आहे.

भारतीय महिलांनी केलेली संपत्ती निर्मिती समजून घेण्याचा हा आकडेवारीवर आधारीत करण्यात आलेला प्रयत्न आहे आणि या निमित्ताने भारतातील आघाडीच्या १०० उद्योजक, प्रोफेशनल्स आणि व्यावसायिक महिलांच्या यशाचा सन्मान करण्यात आला आहे. या यादीतील महिलांची सरासरी संपत्ती रु.२,७२५ कोटी इतकी आहे. या यादीत मानांकन प्राप्त करण्यासाठी किमान संपत्तीची आवश्यकता रु.१०० कोटी इतकी होती.

कोटक महिंद्रा बँकेच्या वेल्थ मॅनेजमेंट विभागाच्या सीईओ ओइशर्या दास म्हणाल्या, “महिलांनी संपत्ती निर्मितीमध्ये मोठमोठी शिखरे पादाक्रांत केल्याचे चित्र गेल्या दोन दशकांमध्ये दिसून आले आहे. कोटक वेल्थ हुरून - लीडिंग वेल्दी विमेन २०२० या अहवालात भारतभरातील विविध महानगरांमध्ये आणि शहरांमध्ये विविध उद्योगक्षेत्रांमध्ये नावीन्यपूर्ण पद्धतींचा अवलंब करणाऱ्या, नेतृत्व करणाऱ्या आणि यशोगाथा लिहिणाऱ्या महिलांच्या रोचक आणि प्रेरणादायक घटनांचा समावेश करण्यात आला आहे. भारताला २०२५ सालापर्यंत आपली अर्थव्यवस्था ५ ट्रिलियन अमेरिकन डॉलरची उलाढाल करणारी करायची असेल तर हे ध्येय साध्य करण्यासाठी महिलांना संपत्ती निर्मितीमध्ये महत्त्वाची भूमिका बजावत राहावी लागणार आहे.”

हुरूनइंडियाचे व्यवस्थापकीय संचालक आणि मुख्य संशोधक अनस रहमान जुनैद म्हणाले, “कोटक वेल्थ हुरून - लीडिंग वेल्दी विमेन २०२० यादीमध्ये असलेल्या महिला या भारतातील सर्वात यशस्वी महिला नेतृत्व आहेत. त्यांच्या यशोगाथांचा प्रसार आणि अभ्यास झालाच पाहिजे. त्या यशस्वी कशा झाल्या? त्यांनी हे यश कसे साध्य केले? या यादीमुळे अधिकाधिक महिलांना उद्योजक होण्याची, व्यवसाय चालविण्याची आणि कंपन्यांचे नेतृत्व करण्याची प्रेरणा मिळेल, अशी मी आशा करतो.”